【本報訊】今次發生倫常命案的樂富康強苑，近年發生過兩宗自殺案件，昨日再發生命案，有屋苑居民表示感到不安，亦有已放盤的業主擔心單位難以售出。
家住14樓的林小姐，在得知慘案發生後感到有點恐慌：「兩年前先死過人，今次仲要三個。不過都唔關自己事，應該冇問題啩。」她稱，業主委員會正在商議請法師到來打齋，希望儀式後自己會安心一點。

住25樓的陸先生表示兩個月前將單位放盤，對此感到深深不忿：「難得上次單嘢淡忘咗，我又喺將軍澳睇中咗合心意、啱價錢嘅樓，𠵱家又整多單咁嘅嘢。」
康強苑分別在03及05年發生過自殺事件。美聯物業九龍區及黃埔區助理區域經理連達輝指出，通常發生命案後，市場反應會受一定影響：「其實都冇咩可以做，惟有過多一、兩年先賣。」
風水命理學家區仲德表示，康強苑附近有座廉貞山：「即個山禿冇樹木，樹代表人丁，個山冇樹，住附近嘅人脾氣會較為暴躁，容易有唔好嘅行為。」他建議該區居民可在門口或露台24小時點上長明燈，可改善人的性情，減少失常行為。至於康強苑的居民，可佩戴護身玉，或於床頭放置經文。