陳慧珊（Flora）、前主播趙海珠同繆美詩，今日去到中環出席香港凱莉山國際學校記者會，陳慧珊嘅老公鍾家鴻同8歲女兒亦有出席，但對鏡頭甚為避忌。

Flora話有計劃為女兒轉到此校修讀，佢話:「學校搵我時都有考慮幫女轉校，但我應承咗阿女6年級先至再諗轉校，因為o依家間學校有好多朋友，我哋都傾緊，除非讀得唔開心先至想轉。」Flora指女兒好有個人意見，作為父母會採納並尊重，Flora指小朋友5歲之後唔可以操控，只可以帶領佢哋前進。Flora透露，佢從不安排女兒參加興趣班同補習班，只讓佢自由發展，Flora話:「人哋讚佢畫畫叻，我都冇俾佢學，但會同佢一齊畫，等佢自己發展。」Florao依家忙於修讀博士課程，佢話最少要用4年時間，期間亦會參與拍劇。