印象中，我求大俠以前提過唔少關於曲波出外試腳嘅消息，次次佢都好唔好彩，明明傾掂數都總係差臨門一腳。𠵱家佢身在倫敦，諗住有機加盟熱刺喇，點知對方睇見佢有傷又諸多留難，睇怕今次又……。
記得佢舊年暑假本來已經同熱刺傾掂，可惜因為代表國家隊上陣比率唔夠，攞唔到張工作紙。好嘞，上季中打算投身飛燕諾，又因為傷而轉會失敗。
兜兜轉轉，本來佢今夏有機會加盟熱刺，好衰唔衰腳傷未好番，據講熱刺方面響合約上加咗一啲附帶條件，令曲波無辦法接受。我求大俠衷心祝福佢呢次傾轉會有新轉機。

梅西亞吼杜尼圖震驚
每年夏天各支升班球隊例牌會有啲動作，西甲嘅梅西亞亦唔例外，但係日前喺佢哋要嘅球員名單之中，赫然發現有拉科爺爺杜尼圖。喂！梅西亞你唔係呀，杜尼圖已經四張嘢，拉科終於唔要佢，你就當佢係寶，我求大俠認為梅西亞來屆如果降回乙組，真係自己攞嚟。

捧美大聯盟有暗湧
美國國家隊全力衞冕中北美及加勒比海金盃賽，不過國內職業足球大聯盟就照踢，波當然照賭。我求大俠奉勸各位下注前千祈、千祈、千祈要吼實軍情、軍情、軍情，始終好幾支勁旅都有唔少精銳份子缺陣，對隊波有幾大影響？真係踢過至知囉。