中國外交部近年為咗搶國際話語權，積極進攻外國社交媒體，好似外交部發言人華春瑩就喺twitter開賬戶，不過八方估唔到華大媽喺twitter第一炮唔係唱好中國同習總，而係為網民叫習近平下台嘅帖點讚！公然拆習嘅台！華大媽呢個讚隨即成為熱話，好多網民揶揄「華大媽這是造反了」，有網民隨後再將呢則帖轉發到華春瑩嘅twitter賬戶，結果立即俾大媽封咗，大媽仲立即清空佢賬號嘅「喜歡的內容」，等人睇唔到佢點讚習下台。

清除「喜歡的內容」紀錄

網民「baiqiao tang唐柏橋」噚日凌晨喺twitter發文：「習近平，請你下台，向天下蒼生謝罪！」同時發佈了一張習近平和一張伊拉克前總統侯賽因被處決嘅相。呢則帖子隨即獲不少人點讚及轉發，不過兩個鐘後有網民發佈一張華大媽賬號「Hua Chunying華春瑩」內「喜歡的內容」截圖，顯示華大媽對呢個帖文點讚。

華大媽公然為習下台點讚，立即引起網民譁然，有人話華大媽果真點讚「習下台」，真係打響倒習第一槍！仲有唔少網民話：「華春瑩自爆了」、「華姐要造反了嗎？」「親自點讚，親自反共」、「親自點讚！支持華春瑩登皇帝位，取代習近平」。

有網民將帖文轉發到華大媽賬號，隨即被封閉。「baiqiao tang唐柏橋」發帖指：「有人將我的這個推文轉發到抗議部（意即外交部）發言人華春瑩推下，立即被拉黑了。華春瑩親自拉黑，這位推友表示喜聞樂見」，又叫網民齊齊轉發呢個推畀華大媽，估計如果太多人咁做，「她（華大媽）會得抑鬱症，或者乾脆關推。不信大家試試。」而華大媽賬號嘅「喜歡的內容」，發生呢件事後已被清空。

李八方