又到10月，過埋呢三個月又到新嘅一年，今年大家煲咗乜嘢心水劇？今個月繼續有唔少新劇煲，似乎唔受KBS同MBC電視台發生罷工影響？當中題材都有唔少選擇，0依家就睇吓有乜新劇煲。

(一)MBC《20世紀少男少女》（首播日期：10月9日）
原定上周首播，不過因為受MBC罷工影響延至本月先播。由《茶煲阿四》女星韓藝瑟同《又，吳海英》嘅36歲男星金基石主演，二人上月仲飛咗來香港拍攝外景，劇情主要圍繞三個35歲嘅女人之間嘅故事，集合愛情同友情嘅現實故事。

(二)KBS《魔女的法庭》（首播日期：10月9日）
韓劇好鍾意拍法庭、檢察官等題材，今次由鄭麗媛、尹賢旻、全光烈等主演嘅新劇《魔女的法庭》就係一齣法庭推理劇，講述鄭麗媛飾演嘅檢察官為咗勝訴而不惜一切，佢貪戀名利，不過因為發生意外事件，令佢被迫調職，並遇到「暖男」檢察官尹賢旻，兩人更合力對抗警察出身嘅律師全光烈。

(三)tvN《今生是第一次》（首播日期：10月9日）
由李民基、庭沼珉、A Pink成員普美主演嘅《今生是第一次》，以無家可歸嘅庭沼珉遇到只擁有玄關擁有權嘅「房東」李民基，一齊入住一間屋展開浪漫同居嘅故事。李民基去年捲入性侵案，令佢形象受損，原本退伍後有新劇推出，但最後都告吹，最終佢事隔五年再攜《今生是第一次》回歸公仔箱。

(四)KBS《瘋狗》（首播日期：10月11日）
41歲嘅型男劉智泰夥拍24歲嘅T-ara前成員花英做主角，題材圍繞保險，講保險調查組「瘋狗」調查各種保險犯罪事件，從而揭發各種詐騙保險案件。由於甚少韓劇以保險犯罪做題材，所以會相當有新鮮感，不過花英一向是非多多，唔知會唔會因而拖累劇集收視？

(五)tvN《付岩洞復仇者們》（首播日期：10月11日）
改編自網絡人氣漫畫，當中漫畫喺網絡評分高達9.9分。劇集由李瑤媛、羅美蘭及明世彬主演，講三個來自唔同背景嘅女人團結起來，展開復仇嘅計劃。

(六)JTBC《The Package》（首播日期：10月13日）
由鄭容和、李沇熹、崔宇植、尹博等主演嘅《The Package》採取先拍後播形式進行拍攝，仲要去到法國巴黎拍攝外景，屬於JYP嘅子公司首部劇集，故事以因為不同原因去旅行嘅主角，喺旅途中遇上嘅故事。

(七)KBS《告白夫婦》（首播日期：10月13日）
36歲嘅張娜拉喺劇中同33歲嘅孫浩俊做同齡夫妻，不過因為張娜拉擁有童顏，所以睇起上嚟就好似後生過孫浩俊好多。而劇中佢哋雖然飾演夫婦，但原來一直睇唔順眼對方，仲後悔結婚，突然間佢哋重回以前，令佢哋愛火重燃。

(八)tvN《卞赫的愛情》（首播日期：10月14日）
韓國男團Super Junior嘅崔始源退伍後首部作品，並夥拍姜素拉、孔明等人，始源飾演冇目標嘅富三代，雖然自戀但唔會令人討厭，個性純真又熱情，突然有日佢變成無業遊民，遇到「打工女神」姜素拉，從而展開一段愛情吏事。

(九)OCN新劇《Black》（首播日期：10月14日）
承接《鬼怪》熱潮而推出嘅《Black》劇，由40歲宋承憲夥拍27歲高雅娜主演，劇情係講宋承憲飾演嘅地獄使者借人類嘅身體，點知喺人間就愛上一名女子高雅娜，不過佢因為冇遵守做地獄使者嘅本份，加上違反天規，所以失去咗人間記憶。