日本BL神劇《大叔的愛》大受歡迎，由33歲男星田中圭飾演戇直男主角春田創一，在職場捲入複雜嘅HEHE關係也懵然不知，角色令觀眾對田中圭好感度大增，令入行18年嘅佢終於吐氣揚眉。

田中圭2011年同女星Sakura奉子成婚，婚後育有兩個囡囡，當佢上位即被傳媒追訪，日前就被拍到佢抱女享受家庭樂。田中圭忽然成為同志界天菜，亦吸納大量腐女fans，結果各出版社都爭商話要將其昔日寫真集再版應市，佢喺年半前推出嘅寫真集《KNOWS》於一星期賣出4千本，登上新一期寫真銷量榜亞軍，成績僅次於櫸坂46隊長菅井友香嘅處女寫真集。

同時，田中圭於2006年推出嘅寫真集《R》、2008年寫真集《一直在花旁的飛蟲》都先後重印，連田中圭登封面嘅刊物《SODA特別編集：錢湯男子》亦決定再度應市，書中以男性角度探討傳統浴場文化，計有多位男星嘅訪問，更輯錄田中圭為雜誌《SODA》嘅專欄到錢湯之不同體驗，在去年3月出版後受到「大叔的愛效應」再度上架。

精選娛聞，喺晒《娛果》
http://fb.com/appledailyent