劉浩龍同王灝兒（JW）今日喺尖沙嘴出席活動，唱歌之餘佢哋仲做埋主持。有豐富主持經驗嘅劉浩龍，就話做冬送大禮，指首次做主持嘅JW表現100分，至於JW就覺得自己算合格。

劉浩龍話今年年底自己生意都唔錯，一連接咗五個騷，而JW話12月29號要喺澳門開騷，嚟緊嘅聖誕節已經同男朋友交換咗聖誕禮物，因為大家電話都壞咗，所以互相送咗部電話畀對方。劉浩龍就話依家人大個咗，都唔想收禮物，只希望收到更多工作，仲話冬至同聖誕同屋企人食餐飯就已經覺得好滿足。

對於容祖兒出席阿嬌鍾欣潼婚禮，話一班兄弟團都好靚仔，更揚言要抄牌，劉浩龍就話：「冇去到飲宴，冇請我，都祝福佢。」提到祖兒話要主動抄牌，佢就話：「依家唔使抄啦，交換Wechat就可以，人大咗識多啲朋友係好事，我間中都去識朋友啦。」而祖兒透露當晚要比武招親，劉浩龍就話：「我冇睇到，答唔到，淨係睇到Kenny關智斌接咗花球，好戥佢高興。」

精選娛聞，喺晒《娛果》
http://fb.com/appledailyent