【新增短片】
天文台今日開facebook帳戶同網民溝通，台長岑智明話，會繼續以輕鬆幽默風格同大家溝通分享天氣資訊，但唔會逐個post都覆，希望大家理解喎。台長話小編出文前都會有同事睇睇，希望集思廣益，唔會抽錯水、踩過界。

今年稍後踏入雨季，天文台估計首個颱風最快6月或以前出現。唔知網民又會唔會用李氏力牆改圖洗天文台facebook版呢？但台長就話從來唔理李氏力牆。不過，隨著誠哥退休，李氏力牆logo可能變咗李澤鉅，仲抵唔抵擋到颱風呢？台長笑笑口話唔知得唔得，仲叫記者唔好問佢，應該喺長和記者會問吓。台長又話李氏力牆係笑話，對於打風時個個講感到無奈，佢話天文台睇住科學事實，希望做好公眾教育，已經有方案處理洗版，希望大家包涵。

早前馬浚偉經常在雨天被網民貼出惡搞圖，「點解水浸都會係黃雨」，之後馬浚偉同台長一齊上節目。依家誠哥退休，唔知有冇機會邀請誠哥同台長對談，拆解吓李氏力牆之謎？

《蘋果》沙士15周年系列網站，正式登場：
https://hk.feature.appledaily.com/sars15/