韓國型男蘇志燮跟女星鄭仁仙主演嘅MBC新劇《我身後的陶斯》，將於聽日首播，並會一連播兩小時，港迷亦可於「黃Viu煲劇平台」追睇。

今次係蘇志燮事隔三年再拍劇，新劇講述原本係國家情報院（國情院）代號「陶斯」嘅秘密特工（蘇志燮飾），於三前年執行任務失敗並痛失愛人，更被誣陷係國情院嘅內鬼，自此隱姓埋名，以另一身份「金本」生活。

不過自從跟居於隔鄰、性格固執兼令人無語嘅師奶高愛琳（鄭仁仙飾）及其一對過度活躍嘅雙胞胎相遇後，原本過住平靜生活嘅金本已無片刻安寧，佢替高愛琳照顧一對子女時手忙腳亂，之後又會跟高愛琳譜出一段搞笑又治癒嘅浪漫愛情故事。另外，金本未有放棄追查當年被誣陷嘅真相，以及背後隱藏嘅巨大陰謀。

今次首度挑戰國情院特工嘅蘇志燮，以型爆造型登場，為完美演繹大量動作場面，更特地於開拍前接受俄羅斯武術訓練。劇組亦揼本遠赴波蘭取景，拍攝「陶斯」於三年前痛失戀人嘅悲慘往事，亦係韓國史上首部劇集於當地取景。

《我身後的陶斯》集間諜、動作及浪漫喜劇元素，緊張得嚟又夠輕鬆，難怪開播前已被視為今季必煲之選。編劇亦坦言當初構思劇本，就係諗住蘇志燮嚟塑造金本呢個角色，令劇迷非常好奇佢將如何演繹由型爆特工變身成保母。「黃Viu煲劇平台」將緊貼韓國，逢星期三、四深夜上架。

精選韓流，喺晒《娛果》
http://fb.com/appledailyent