【花生蘋台】香港要推「國教」? 劉曉波咪最好嘅教材囉!
劉曉波肝癌花生蘋台
香港候任行政長官林鄭月娥,早幾日接受央視採訪突然又攞「港獨」嚟講,話有必要在中小學推動國民教育,再度將沉寂多年的「國教」爭議再度炒熱。嗰位曾經企喺奶媽身後面嘅「唔得掂」局長,之後就出嚟咁話,國教好無辜咁俾「洗腦」兩字扣死,仲強調啲老師又教「六四」咁敏感性嘅議題。香港政府真係想幫國教脫除洗腦教育嘅污名,不妨考慮將剛獲保外就醫嘅諾貝爾和平獎得主劉曉波列為教材。教育局諸君,有咁嘅膽識同道德勇氣嘛?否則,請收手!
點解劉曉波係絕佳嘅國教教材?唔理你係「左膠」定「右膠」,一般人都會同意,國民教育必須具備現代公民意識元素,若可做到以事實為依據,應可培養學生獨立思考和批判精神,咁即係可要明辨是非,講理性邏輯,唔能夠指鹿為馬,你話咁就係愛國就係愛國。事實上,劉曉波嘅言論一向愛國,睇佢嘅過去言行,就有齊晒推動國教嘅三大元素:歷史、文化及國情。
首先,講國教中嘅歷史元素,劉曉波因言獲刑,咪正好引證咗中國自古以來「文字獄」有幾恐怖。讀過下歷史嘅人都知,中國古時嘅「文字獄」係一種殘害忠良、打擊異己嘅手段,卻又不時在中國歷史中周而復始咁出現。唔好講咁遠,就講明清兩代,幾多文人就死喺「文字獄」。即使到中共建政後,「文字獄」還沒停止過囉。而劉曉波其實咪只不過係一名書生,書生議政對政權有幾大威脅先?況且從劉參與1989年學運,到他在2008年因發表《零八憲章》,都被外界形容為公共知識份子中嘅溫和派,甚至曾經俾嗰啲流亡海外嘅異見份子批評為與中共合作嘅妥協派。事實上,有睇過劉曉波嘅作品都知,佢從沒喊過要推翻中共,但中共依然因佢嘅言論,以「煽動顛覆國家政權罪」咁嘅莫須有罪名,判佢有期徒刑11年。呢個咩唔係說明中國「文字獄」有幾咁暴戾嘅最佳例子?!
其次,要講國教中嘅文化元素,劉曉波咪正好引證咗中國傳統知識分子嗰種要「濟世經國」、滿懷憂國憂民中嘅悲劇人性囉。同我哋香港嘅「叻仔」文化好唔同。啲教歷史或文化科嘅老師都好推崇嗰啲講真話、有良心、有道德勇氣嘅歷史人物㗎,仲有呢句「苟利國家生死以,豈因禍福避趨之」就最攞命,依家咪可以搵劉曉波來討論下囉。話晒劉曉波有博士學位,又曾是大學教授,佢嘅著作又有番咁上下,有個現成嘅個案,點解唔可以做教材。
至於講國教嘅國情元素,呢個就最直接,咪係劉曉波引證咗中國仍是踐踏人權、自由嘅國家囉。劉曉波惹來牢獄之災,係因為佢喺2008年12月10日《世界人權宣言》發表60周年之際發表《零八憲章》,叫中共進行政治民主化改革、改善人權狀況,仲提出以中華聯邦解決兩岸問題等構想。佢講呢啲,點解唔合符國情呢,咪可以叫啲老師解釋一下囉,做埋教材不好嗎?!
其實,劉曉波嘅著作及言論甚多,但佢喺2009年12月23日在法庭上的自辯書《我沒有敵人——我的最後陳述》,就係最好嘅國教教材啦!呢篇自辯書,濃縮了佢對現代中國政治改革及自由民主嘅見解,當中情理兼備,曾在2010年12月諾貝爾和平獎的頒獎禮上,由挪威女演員莉芙烏曼朗讀。事實上,佢喺呢篇自辯書中,從沒顯示要挑戰中共政權嘅意圖,甚至讚揚中共提出「以人為本」、「創建和諧社會」等執政理念。可惜,中共連呢篇文章論點也容不下,仲有咩好講?!大家不妨上網細讀,中學老師亦可將呢篇文章,自行加入公民或通識課程中,作為另類教材。