林鄭在6.16大遊行前夕宣布暫緩修例，加之當日沙田有馬跑，筆者諗住參加遊行的人數，頂多只有六月九號那次的三至五成。筆者太低估香港人了，相隔一星期，出來行的人竟然有增無減，筆者不得不承認大跌眼鏡。

筆者有位馬友，數十年來跑馬幾乎從不缺席，那天也捨馬場而就維園。馬友告訴筆者，參加遊行不等於放棄跑馬，現代科技先進，一邊行街街，一邊以手機落注和觀賽，興致不減。

佢仲話，六月九遊行逼使林鄭半跪，香港人索性要响六一六起個孖，逼到林鄭成個跪低晒為止。淥一淥，易掹毛，林鄭真係响六一六俾香港人連胳甩底毛都掹晒落嚟！

馬友又話，唔入馬場一樣揾到食，賽前有沈廐馬主同佢講，沈廐大出擊，起碼有兩三場頭馬交出，但來料冇講哪兩三隻餐士最大，佢就唔理三七廿一，用累進注碼押向沈廐馬，比方說，第一場買十蚊沈廐馬W，中咗就第二場又由十蚊買起，唔中則第二場加碼至廿蚊，再唔中第三場就買卅蚊，如此類推。

沈廐頭場贏完匹派十元五角的「知道必勝」，接著二、三、四、五、六、七、八場都冇贏，每輸一場，注碼就加一個單位，到咗第九場先至有回報，但呢個回報非常和味，事關勝出的是六十二倍的「勞動創造」！

呢種賭法，俗稱「賭纜」。而「賭纜」的先決條件，是絕不能加入自己對馬匹勝算的主觀判斷。如果不是堅守「賭纜」法則，一見「勞動創造」咁冷，認定幕後冇決心和信心搏殺，慳番呢注唔買，眼光光睇住佢跑出嚟，那時的心痛程度，肯定比聽到六月九之後林鄭出嚟狗噏有過之而無不及。

-----------------------------
你撐蘋果 我捐$1
支援反送中抗爭者