已故樂壇天后梅艷芳的遺產管理人匯豐信託，近日在一連十三日的「Last but not Least──最後芳華」網上拍賣會，將阿梅最後一批合共3,100多件的遺物拍賣，當中包括有新秀金獎，連阿梅的內衣也拿出來拍賣，今晚6時將結束有關競投。
志偉曾指會聯同阿梅生前好友及演藝人協會出手阻止拍賣，或夾錢投回所有遺物，昨日他在銅鑼灣出席活動，談到事情的最新進展，志偉語帶無奈地說：「我仲等緊對方嘅答覆，我哋覺得好失望，其實我哋嘅要求好簡單，只係先將一啲私人物品拎走唔好拍賣。」他續說：「有好多拍賣物品，並非阿梅嘅遺物，有啲鞋係dancer，有啲亦唔係內衣，只係啲打底衫同泳衣。」志偉更直言：「如果直到聽（今）日信託基金都未有答覆，我哋會放棄，唔會競投任何物品。」

為阿梅設紀念館

談到拍賣當中有不少是具紀念價值的獎項，志偉說：「其實有啲物品都好希望留番，我哋諗住幫阿梅設立一個紀念館，有啲獎都已經甩頭甩骨，如果獎項真係流失咗，我哋向金像獎申請番，個獎係阿梅就係阿梅，有啲無謂嘅嘢，不如燒咗佢，唔好拍賣。」
另外，身為演協副會長的肥媽，昨在油塘出席活動，透露與曾志偉及現任會長成龍已與匯豐信託進行磋商，並說︰「仲喺度商討，我個人覺得好陰功，以為基金會幫佢賺錢養梅媽一世，點知所有錢都畀晒律師！」此外，在一眾拍賣中備受爭議的新秀金獎、金像獎女配角獎及灰色內衣，倒數22小時的競投價分別是8萬、3萬4千和1千4百。
採訪：譚倩宜
攝影：陳慧安