今日先至有報道話，口碑同收視越來越低嘅《溏心風暴3》，收視已經跌到21.4，而長線處境劇《開心速遞》，在大小姐（林淑敏飾）加持下，上周（12月11日至月17日）收視由21.1點升至21.7點，已經超越咗《溏心3》。大家驚訝問：《溏心3》仲未腰斬咩？

在無綫禁奶令下，《溏心3》諷刺地以奶為賣點——奶，係人妻陳敏之嘅奶。為求宣傳，陳敏之真係瞓晒身，唔單止同唐文龍床戰連場玩埋去浴室，陳敏之仲自爆拍攝期間餵緊人奶，所以俾文龍胸壓時，好驚會「咇奶」。

《溏心3》依家分分鐘靠陳敏之嘅大奶奶救收視——你以為。無綫就話「對奶敏感」，大陸網民唔係。今日李司棋、夏雨、米雪、關菊英、陳敏之、阮兆祥等一齊出席劇集宣傳，宣佈劇集點擊率已經破六億。

《使徒行者2》喺大陸騰訊視頻國粵雙語播放，點擊率達錄19億，《溏心3》有6億，唔差吖，好似係，仲有進步空間，連怪夏雨都話唔滿足，認為可以更加高，司棋姐就笑言：「我平時拍開港劇，見到呢個數字已經好興奮。」

驚心動魄？未算，有傳《溏心3》將會開拍電影版，策劃人夏雨承認：「確實已經籌劃緊，但係暫時收到兩個劇本都唔太滿意，亦都唔會再次爭產為題材，希望歡歡樂樂，一步一步嚟。」由爭鮑魚到月餅到今次茶記，下次爭咩？有冇人真係肯買飛入場0架？

夏雨話，《溏心3》香港收視低，歸咎於大陸同香港唔係同步播放。夏雨話身邊好多朋友同佢講話已經睇咗廿幾集，但香港仲係播到十幾集。

拿，《使徒行者2》咪又係咁……

講到話套劇依家靠陳敏之唐文龍胡琳呢條三角感情線救亡，佢哋竟然話好多觀眾反映謂呢條不倫戀好有真實感，文龍仲出賣朋友話佢哋身邊都有發生咁嘅事。至於場床戲，佢哋話拍足一日，絕對唔係觀眾所見嘅咁enjoy。有點變態嘅係……胡琳話敏之同文龍床戰時，佢都在旁邊睇住，第一次睇仲覺得好有趣：「見到文龍胸肌咁大，我都想撕爛佢件衫摸下。」

好重口味真係…

更多娛聞，喺晒《娛果》
http://fb.com/appledailyent