近期幾乎每日都爆出女星曾被性侵及性騷擾消息，今次輪到大熱美劇《權力遊戲》（Game of Thrones）女星Lena Headey站出來指控電影大亨Harvey Weinstein，直指對方曾兩度向佢施魔爪。

現年44歲嘅Lena Headey透過Twitter公開多年來秘密，佢坦言早在2005年，自己在威尼斯影展上已成為Harvey Weinstein嘅目標：「當時為《格林兄弟幻險記》（The Brothers Grimm）出席首映禮，Harvey要求我陪他到海邊，其間更有暗示性及動作，我當時只好笑着應付。」多年後，Lena到洛杉磯旅行期間遇到Harvey，二人食早餐提到拍電影事宜，點知男方之後以交劇本俾Lena為由，提議一同上酒店房繼續傾。Lena表示的確有偕Harvey搭電梯上樓，但Lena當時向Harvey表明自己除工作以外嘅任何事都毫無興趣，仲話：「請不要以為我是另有目的，甚麼事也不會發生。」呢個時候Harvey未有出聲，當出電梯後前往其房間之際，Harvey隻手放喺Lena背上，不過行到門口時發現匙卡開唔到房門，Harvey表現嬲爆即同Lena搭電梯到停車場，Lena話被對方大力捉實手臂送上車，Harvey更向Lena表示唔可以對任何人講，Lena話上車後就開始喊。