「日做夜做　病痛都要做　加租加租　問有乜尺度　你我冇晒癮　皆因商家跟制度　有路」－－呢首改編自《愛情陷阱》嘅二次創作歌曲《狗竇陷阱》，出自浪子詞人潘源良嘅手筆，飲廣東話奶大、寫開原創歌嘅潘Sir，決定玩盡廣東話文化，跟7位志同道合音樂人於明年2月合作開騷，唱盡香港悲歡離合，潘Sir更踩過界唱埋主音㖭。

呢個騷名為「潘源良生炒廣東話之有辣有唔辣」，明年2月15-17日假灣仔壽臣劇院舉行，潘Sir接受《蘋果》訪問表示：「我哋係一班鍾意即興發揮同創作嘅音樂人，每逢初一十五月圓月缺會聚集jam歌，今次演出都係源自呢種比較波希米亞式精神。既然音樂可以變化，歌詞亦可以更貼地表達感受，於是就二創。而近期廣東話竟然成為自我質疑嘅題目，我幾十年做所有嘢都靠廣東話，當然要講番幾句『棟篤喊』。」

首支二創歌《狗竇陷阱》已在網上推出，以劏房為題，歌詞抵死，潘Sir話：「二創歌曲會有十幾首，有辣有唔辣。辣嘅係貼地，講劏房講普選講養老講高官表現講笑到喊講食老本講港女講大媽等；唔辣嘅係貼心，講人生講成長講志向講瘋狂講清醒講心事講如何重新出發。」

問到隊band叫乜名？潘Sir表示：「band冇特別名，都係志同道合嘅朋友。黃仁逵喜歡玩藍調，隨着心情意境即興發揮，Tommy Ho玩爵士結他，在香港樂壇早已為好多歌手錄音或現場演奏，Edmund Leung愛好節奏敲擊，Rita Ip主力鍵琴，曾經參與劉以達嘅樂團演出，Sharon Lui愛好吉卜賽小提琴，何佩欣玩鋼琴及口風琴，強尼同我一樣周身癮，我一早知佢鍾意唱歌，當然拉埋佢玩。」

精選娛聞，喺晒《娛果》
http://fb.com/appledailyent