究竟個差人今日乜嘢結果呢？八方唔係講緊Laughing哥生死，而係警務督察協會主席廖潔明。廖Sir參選居住嘅將軍澳蔚藍灣畔業主委員會選舉，今晚投票，有人向八方報料，質疑廖Sir明知故犯，屋苑唔畀候選人將宣傳單張放入住戶信箱拉票，佢嘅助選團卻唔理，唔係幾啱數。
廖Sir向八方澄清絕無知法犯法，但承認曾派傳單入信箱，因為管業處初時冇講明規矩，所以先有此誤會，佢其後已揸正嚟做，循規蹈矩拉票。對於被指有左派政黨撐佢，甚至鋪路日後出擊，廖Sir強調自己以獨立人士身份參選，目的係想令屋苑管理更妥善，冇其他政治目的，咁多是非始料不及。