日本混血人氣女星Becky，今年1月被爆搭上組合極品下流少女的主音川谷繪音，但川谷原來一直向外界隱瞞已婚身份，Becky都係同佢拍拖之後先知佢已婚，而川谷則稱會同妻子離婚。Becky被爆搭上人夫之後，形象破產，失去一切工作，但佢個人夫男友川谷反而因而知名度急增。

二人被爆不倫戀情、Becky失去所有工作後，川谷竟然想同老婆修好關係，但原來o依家已經分咗居正準備離婚。川谷同Becky嘅戀情係被《週刊文春》踢爆，但佢喺事發後首次接訪，就係接受今期《文春》訪問，同老婆分居準備離婚，係佢親口同《文春》講，但亦有其他爆料網指川谷想同老婆修補關係，但係佢老婆已經心死，所以決定離婚。

而川谷一直被指係賤男，除咗出事後，全部由Becky面對之外，佢仲飛走Becky想食回頭草，而且佢仲係演唱會上話：「網民成日叫我出嚟道歉，我同邊個道歉呀？」因而被鬧爆。川谷相隔兩個多月後今日首次更新twitter，解釋話呢句話唔係同粉絲或者工作人員等有關人士講，佢依然好想用音樂同粉絲溝通。