阿松去北京多數會住北京國際俱樂部飯店，嗰度好多猛人，八方前晚在大堂飲嘢就撞到天王黎明，雖然八方唔係娛記，但Leon都好友善咁打招呼。昨日下晝又撞到以前做導演的麥當傑，原來佢已經做咗StarTV華語節目製作總監，今次來北京搞ChannelV的「榜中榜」，所以黎明都嚟埋。
八方朝早食早餐，再撞到恒生銀行副董事長鄭海泉同埋花旗銀行環球金融機構業務部主管葉君誠，鄭大班今次唔係嚟搵生意，而係參加政協會議，葉君誠當然係來北京傾吓點樣用美金搵人民幣。
北京咁多猛人，可惜八方係「黑市記者」，如果唔係索性長期喺度打躉，好過周街撲新聞。


E-mail：[email protected]