香港經濟近期愈嚟愈好，職場轉趨暢旺，多咗公司請人擴充業務，間間公司都話要加薪留人。噚日就有網民喺《香港討論區》討論長實（001）揸住兩成股權嘅民安控股（1389），請07年應屆大學畢業生嘅事。
唔知係咪民安呢個名好有大陸feel，呢間公司舊年年尾上市嘅時候，已經有好多散戶搞錯，以為係內地嘅保險公司，遲早加入中資「五行三保」行列，盲目入飛認購。當時有報紙提醒股民，呢間係香港註冊，但喺內地有生意嘅保險公司，1949年已經成立咗喇。

內地有生意

點知仍然有人搞錯，網友cpacpa就問人：「有冇聽過民安請應屆畢業生，有冇人去過面試？」但佢自己都未搞清楚間公司係乜東東，懶醒咁話民安係大陸公司，好彩得tropicalfish即時糾正。
有條友仲正，autumn_autumn話自己「曾經上去買保險，畀我感覺呢間係好休閒嘅公司，心想喺度做嘢就好，而且係5天工作。」
真陰功，民安班高層知道有人咁講，唔知有乜反應呢？話晒間公司啱啱上市，一定要畀人感覺生意滔滔，客仔多多先至得㗎，如果唔係，上個月認購咗民安股票嘅投資者真係傷心死，都唔知好唔好沽貨算數。
不過，更令人傷心或者擔心嘅係，𠵱家啲後生仔搵工先決條件唔係晉升機會、前途或者人工，而係要休閒同埋5天工作。希望呢位仁兄只係隨口講吓唔係當真。
仲有，𠵱家差唔多間間上市公司都有自己網頁，網友橫掂上網吹水，點解唔花多些少時間，去人哋公司網站睇睇資料，做吓功課。試諗吓，面試時人哋問你知唔知民安係乜，你劈頭就話係大陸公司，仲唔即時「拜拜」！