今年因為財政預算案拉布，所以立法會平反六四辯論冇法喺六四燭光集會前進行，不過正所謂你有張良計，我有過牆梯，長毛梁國雄噚日喺立會辯論標準工時時候，一樣有辦法將個發言議題，由講緊標準工時扭到去平反六四，叫人出席六四燭光集會，仲可以順手抽埋工聯會王國興水！
話說長毛噚日就標準工時發言，批評冇標準工時，令打工仔冇時間喺放工後去做其他活動，呢個時候長毛突然話題一轉，話好似六四燭光集會，個集會到9點半之後先完，叫大家打工仔辛苦少少，放工後去六四燭光集會，支持平反六四，仲讀出莫忘初衷、燃點六四燭光等口號。
之後仲抽埋工聯會王國興水，叫大家咪學王國興咁支持標時得把口講，要有行動先得！而最神奇係，主席曾鈺成又冇叫長毛停，係喎，點解曾主席冇話佢離題呢？