乜嘢叫做「上咗頭」？睇吓會計界立法會議員陳茂波就知！此君以為自己被內定為新一屆財政司副司長，就坐定粒六，實食冇黐牙，在新一屆政府架構改組仍然未過、而且有可能趕唔切在七．一前通過之際，就揀埋接班人，高調搵自己友、前稱會計界補習天王、現稱會計界黃子華的Nelson林智遠接班做會計界立法會議員，實乃建立自己的「陳氏王朝」！
你估你係英女皇搵繼任人呀？家立法會會計界議員，唔使選舉呀？Nelson雖然擅長搞會計補習班，但講實力，未必夠其他會計界大佬砌。就好似稅務專家梁繼昌，實力就高佢幾班，陳茂波以為「欽點」Nelson，佢就贏梗，真係太天真！
陳茂波最上頭嘅，係佢自己未過橋，就先拆埋自己條橋。唔好畀沙膽虹估中，新政府架構改組方案七．一前如果過唔到，會計界立法會議席又俾人坐埋，到時新政府架構九月再上立法會又過唔到，陳茂波就變成「雙失」！
唔信？賭餐飯吧！
沙膽虹