時近年尾，華華不斷收到各路英雄邀約飯局敍舊，其中一位係一年蒲頭一次、行蹤神秘、極度低調嘅星美國際（198）老闆覃輝。原來呢個民營電影大亨，過去一年跟風搞網購。

戲院大堂賣獨家產品

覃輝同華華講，由於自己都有玩網購，玩玩吓覺得呢瓣有得做，加上星美旗下啲戲院嘅大堂，其實有好多地方，所以用得唔好嘥，可以用嚟賣嘢。何況星美又有咁多明星，好多仲係獨家嘅，好似華華至鍾意嘅影帝劉燁咁。而且，星美一年開唔少大片，再加上有咁多電影周邊產品，因利乘便，就係咁搞咗檔「星美滙」互動商城嘅網購業務出嚟。
星美滙網上商城已經開通，覃輝話，北京同上海嗰10間星美戲院亦已經有星美滙。不過，戲肉稍後先至出現，因為佢已經搵咗中華海外企業信譽協會旗下嘅「香港名牌」做partner，實行賣香港正牌正貨。
覃輝同華華講，諗新搞作都係想將星美嘅真正價值反映。咁又係，上周五星美收0.29元，同今年初0.415元嘅高位，仲有大段距離。

李華華
mailto:[email protected]