台灣天王周杰倫（Jay）噚晚喺紅館舉行第2場「地表最強2世界巡迴演唱會2018」，等一班Jay迷散場後，周杰倫先喺後門離開，當時現場仲有約100位Fans等佢。

喺周杰倫出嚟之前，先係見到楊千嬅同老公丁子高、任賢齊相繼離開，仲有邱淑貞帶住囡囡沈月、沈晨一齊離開，兩姊妹飲檸檬茶嘅動作非常一致，家姐沈月飲完檸檬茶，仲抱住妹妹上車。

主角周杰倫一出門口，就揮揮左手同Jay迷打招呼，之後四部七人車一齊出發去到尖沙嘴，周杰倫落車時約10名工作人員即刻上前，保護周杰倫上樓，據知佢哋去咗一間食肆打邊爐醫肚。