方嘉柏贏完大熱「光速銀桂」唔夠喉，第三場馬上有「薑餅人」擊敗「川河猛駒」、「國粹精華」變倍起孖，馬主馮柏基的好友黃婉曼悉心打扮，果然帶旺「薑餅人」。呢口方廐孖寶派146.5元升水不少，買中當然Happy啦！「薑餅人」今季由沈廐轉投方廐，一直跑極冇表現，唞咗差唔多三個月後呢晚復出，渡江跑三班谷草1200米，結果由潘頓贏條件賽打破轉倉悶局。方嘉柏再一次證明自己係條件賽專家，皆因佢近六季派七駒跑三班谷草1200米條件賽，豪奪五冠兩亞未甩過Q，唔係其他練馬師可以比擬。仲有「薑餅人」今次同「川河猛駒」串Q，後駒鞍上人正係第二場幫方嘉柏贏「光速銀桂」之雷神，帶挈捉路馬迷贏錢。