徐福銓喺86年離開無綫，全情投入本身嘅行政工作，眼光獨到嘅佢將COVA引入香港，成功打造事業王國：「91年大約36歲，問自己做得咁辛苦，始終工字不出頭，所以走出嚟搞COVA，因為我做名牌子推廣，好多時去歐洲開會，都會喺米蘭名店街嘅COVA坐下，覺得幾好坐，甜品做得好靚，香港好似冇呢啲喎，我就諗，如果能夠將呢個甜品帶嚟香港，應該有生意，差唔多一年後，攞到呢個牌子返嚟。」

問到經營COVA成功之道喺邊？David表示：「成唔成功我唔夠膽講，首先要知道呢個牌子喺香港有冇生存價值，當時我睇佢有，但有就一定成功咩？管理方面好重要，我覺得力不到不為財，所以開COVA時，我真係由朝到晚都喺度睇住。」第一間店開在中環，有日David聽到客人對話：「呢間嘢幾好食，不過唔知捱得幾耐，有啲做做吓越嚟越差，睇吓呢間又點。」David話：「呢番話啟發我唔想衰畀人睇，有一種好勝心，一定要落心機。2、3年後，飲食界前輩楊貫一先生同我講，如果有客人嚟你餐廳食嘢，可能好貴要一、兩萬元埋單，佢起身走埋嚟主動向你握手微笑，你做到咁就成功。我都知品質好重要，人哋使咁多錢仲要多謝你，係好唔容易嘅事。」

當年銅鑼灣店發生楊恭如被掌摑事件，有人疑為毛玉萍怒駡楊：「COVA係你嚟嘅咩？」問到David當日喺唔喺現場？佢笑笑話：「佢哋周不時都嚟，我都見過佢哋，當年發生呢件事，我就唔喺度嘅。不過咁，啲人話發生呢件事之後，COVA就旺場旺咗幾個月，我希望旺場唔係因為咁，如果係都唔係好事。感覺上真係差唔多，當時好多藝人鍾意嚟COVA，例如張國榮（哥哥）、羅文、沈殿霞都好捧場，好不幸佢哋都過咗身！」

有冇親自招呼佢哋？David話：「有傾吓偈，哥哥最鍾意食蜆肉意粉，羅文先生都好鍾意蜆肉意粉、Pizza、Cappuccino，肥肥唔使講，最鍾意食我哋啲雪糕，每次嚟都食。」有冇人認到你做過主持？David話：「有啲藝人可能真係唔知我以前做過節目，有啲人可能隔咁多年，唔記得我樣係點。但哥哥記得，因為我都訪問過佢。」

點解後來要賣盤？David表示：「93年開，做咗差唔幾23、4年，我都60幾歲，3年前COVA總公司被LVMH買咗，計劃大肆擴張，自己覺得年紀開始大，冇咁多精力，搵人繼續理想係對牌子負責，自己做落去未必咁好，所以先諗住賣盤。美心集團係一間專業同有經驗嘅公司，佢哋有好嘅計劃繼續發展COVA，同LVMH合作創造更好將來。」有傳賣咗成億？佢笑笑話：「同美心有保秘協議唔講得。」

《蘋果》第十二屆金話梅電影選舉（Golden Plum）又嚟喇!由今日起，請在以下網址（ http://campaign.appledaily.com/goldenplum2017 ）投票，選出心目中的爛片之霸，截止日期係4月6日，賽果將於香港電影金像獎舉行前夕（4月8日）揭曉。