【觀眾叫「光復香港」】林海峰開騷 嘲「一個人」激嬲全香港人
蘋果日報 2019/09/19 21:36
林海峰是但噏
（攝影：曹家誠、王連連）
一連7場的林海峰Talk Show《林海峰是但噏Happy Monday》，今晚在紅館舉行，林嘉欣也有前來捧場。
Talk Show的舞台設計成一對大腳踩蕉皮，非常過癮。表演於8點半開騷，現場先播出一條交代林海峰在17年騷後做過甚麼的片段，播片時，觀眾亦不停叫「光復香港 時代革命 五大訴求 缺一不可」，穿了T恤短褲的林海峰現身，他說：「有人叫我講嘢唔好咁偏激，要盡量中立啲，有啲話靠你啦，為香港人發聲，我覺得自己好似好重要咁，唔知點解。」
觀眾聽到即拍掌，林海峰即說：「o氹人笑難，o氹香港人笑難，o氹呢班唔開心嘅香港人去笑係難上加難，靠一個人喎，大佬。」觀眾給林海峰熱烈拍掌，他續說：「相反激嬲香港人好容易，激嬲全香港人都好容易，一個人都可做到。」再獲觀眾歡呼，林海峰說：「你知我講邊個咩？你心入邊係咪一個單字？原本個騷叫Happy Monday，呢幾個月發生好多事，周六、周日，星期一都唔開心返工，我好想令大家好開心返工，只要有一個人唔再返工，就令全部人返工好開心。」林海峰似揶揄特首林鄭月娥，令全場歡呼，他再說：「咪就係我，覺得我應唔應該上來，我應唔應該開工，如果想我『下台』換衫嘅話，你知我叫林狗，你叫乜啦。」林海峰即叫「林狗」，觀眾和應「下台」，林海峰嫌觀眾叫得不夠激烈，他即呼籲大家加點感情，結果林海峰和觀眾再對應，林海峰說：「嗱，你哋叫我下台，我立即順應民意，下台換衫開工。」
再出場時，林海峰問觀眾搭甚麼車來時，當觀眾回答自己揸車後，林海峰就問泊在那裏，之後他笑說：「泊喺火車站，咁希望你架車一陣唔會出軌啦。」之後他又指自己今日遇到一個拖着行李箱從廣州來看騷的朋友：「佢話好驚呀落嚟香港，驚返唔到去，嗱今晚我哋全部人保你，OK，有乜事嘅時候我哋保你一個，歡迎廣州嘅朋友。」
採訪、攝影：曹家誠、王連連
林海峰talk show舞台設計得非常過癮。