英格蘭球星班WAGs，好似朗尼老婆高蓮同謝四太座居倫等，為咗出風頭，有時會着到鬼咁性感，完全唔理另一半感受；不過，佢哋同克羅地亞WAGs成員妮慧絲（NivesCelsius）比，絕對係小兒科，事關呢個幫成人雜誌《花花公子》拍過裸照嘅克羅地亞靚女，早前就作咗隻鹹濕歌，歌詞內容以挑逗費蘭度托利斯等球星為主，認真出位到爆。

呢個妮慧絲究竟係乜水？佢唔止係成人雜誌模特兒咁簡單，本身亦係曾經效力德國球會卡爾斯魯厄嘅克羅地亞後衞杜亞碧嘅老婆，所以真係大有來頭，絕對唔係二打六。
影得鹹相嘅，梗係要有樣有身材，妮慧絲當然符合呢兩項條件；咁都未夠，佢仲好大膽，試過喺薩格勒布戴拿模嘅練習場同老公打野戰，結果搞到薩格勒布唔要佢老公，將佢踢去德國。
妮慧絲可能嫌喺練習場搞嘢唔夠出位，於是再玩激啲，出隻鹹濕歌挑逗一班世界級球星。隻歌面世後係網上熱播，雖然係南斯拉夫話，但有人繹譯成英文後，就知道啲歌詞超級大膽，其中一句係咁：「入波、入波，入我波啦。我家陣已經一絲不掛，你都一樣，同我赤裸相對，快啲嚟入我波啦（Goal,goal,goal,scoremeagoal.I'mnaked,youarenaked,scoremeagoal）！」至於另外一句仲激：「做我嘅費蘭度托利斯（F托），好似基斯坦奴朗拿度（C朗）令我咁滿足，好似美斯仔咁震撼我（BemyTorresFernando,keepfillingmelikeRonaldoandshakememylittleMessi）。」
我求大俠有睇過妮慧絲唱佢隻鹹濕歌嘅片段，唱得好唔好聽就見仁見智，不過佢就似乎好投入。妮慧絲咁講：「我只係講出一個真相，就係3位球星同佢哋女人之間發生嘅事。」
F托出名係好老公，C朗就俾佢嘅俄羅斯模特兒女友艾琳娜實，所以妮慧絲淨係有機會向剛回復單身嘅美斯埋手；如果係真嘅話，唔知美斯頂唔頂得住呢？