大家樂（341）主席陳裕光嘅女婿趙益坤（Leonard），家族本身做海外物業投資，Leonard除咗幫父母手，亦有創業，今年就效法外父進軍飲食業，開有機咖啡店；一講有機乜乜乜，大家都估到產品售價肯定貴過大家樂，陳裕光畀意見時，都真係嫌佢間咖啡店貴㗎。
Leonard喺九龍灣零碳天地公園開設嘅有機咖啡店Kelly & Moss（兩種綠色色調分別為Kelly Green與Moss Green），店名已經具有環保槪念，不過一杯咖啡30元以上，一件切餅至少40元，唔係走大眾化路線。
Leonard透露，外父陳裕光不時幫襯，亦會畀意見，曾經嫌貴咁話「30幾蚊一杯咖啡，可以食到一個餐喇！」Leonard只好攤攤手板，意指難以相提並論。的確，大家樂嘅優勢係銷售量大，產品定價可以相當較便宜，Leonard間咖啡店以生活品味行先，其實品味呢回事，好難話佢抵唔抵。
「其實外父知道我開咖啡店都感到驚訝，佢一開始就提醒我，（做飲食業）冇想像咁易，最難係營運得好。」Leonard對此十分認同，尤其喺控制各項營運成本方面，「外父提醒我，食物成本要控制喺總成本三分一，但我哋賣有機產品，好難keep到」好在開業一年已經封蝕本門。

老闆唔鍾意飲咖啡

雖然咖啡店發展符合預期，但係佢暫時唔心急開分店，只係有計劃多做婚宴活動或企業客生意，增加收入來源。
有趣嘅係，Leonard呢位咖啡店老闆，本身唔鍾意飲咖啡，一飲就心跳頭暈，反而太太陳浩寧（Candice）就鍾意飲朱古力咖啡，做室內設計嘅太太幫佢設計呢間咖啡店，佢就送太太一世任飲咖啡，夠晒sweet。

趙益坤夫妻檔　明年開傢俬店

成日話情侶或者夫妻日對夜對，一齊工作，好易產生磨擦，傷感情，但趙益坤（Leonard）與太太陳浩寧（Candice）就冇有怕。訪問期間，Leonard不時讚太太做室內設計好勁，好有創意，佢哋兩口子亦計劃合作開一間室內設計傢俬店，暫定明年5月開業。
Leonard喺美國讀大學時，認識細佢3年嘅Candice，當時奉命照顧世叔伯嘅女兒，後來互生情愫，2012年結婚，舊年3月兒子Logan就出世。
佢話，佢跟太太相處10年，已經好了解對方嘅做事方式，唔出聲都知對方諗緊乜，舉例，「有事唔開心，我鍾意講出嚟，太太就可能要多啲時間消化件事，諗好先至傾；當有意見分歧時，就會多花時間去傾，唔會嗌交」。今次佢哋合作創業，Leonard會負責營銷，太太就負責設計，希望夾出火花。

李華華
mailto:[email protected]