35歲嘅ViuTV台柱黃心美(Scarlett)一直以主持同司儀嘅工作為主，不過近期睇開電視，突然間見到佢嘅踪影喺無綫出現，對手仲係當紅小生王浩信同黎諾懿，差啲以為佢過咗檔，同妹妹黃心穎一齊做嘢！日前黃心美喺天后接受訪問，閒談間亦都有講到呢件事，佢話：「其實係咁啱啫，拍廣告喺嗰度落啫，不過都要好多謝客戶，希望佢哋繼續愛戴我。」Scarlett仲話：「連容祖兒都有問過，點解可以咁，有人覺得我半隻腳义咗無綫，我好開心呀，不過妹妹話點解唔係佢，之前同浩信合作過，咁我又唔好意思話我好過佢，客戶眼光係雪亮，佢自己知自己事！」

喺啱啱播緊嘅ViuTV真人騷《暗中旅行2》，Scarlett同埋視障人士李軒同未婚妻Umi去咗日本，Scarlett仲親自操刀幫佢哋影婚紗相，心美未有因為自己嘅離婚經歷而感觸淚，反而好戥佢哋開心：「要喊嘅話，上一輯已經喊晒，嗰次去咗台北拍外景，咁橋喺前夫住附近嘅地方，嗰陣我冇諗過會再行番嗰地方，所以真係好感觸，今次喺節目係開心嘅眼淚，為佢哋搵到真正嘅幸福而開心，我相信自己將來都會遇到！」

【當你越唔強求，上天總會安排俾你】
重提往事，Scarlett有啲感觸話：「結婚係兩個家庭結合，屋企人係冇錯，突然間因為我哋而搞到兩個家庭冇來往，呢樣係最慘，佢 (前夫)冇同我爹哋媽咪聯絡，但係我有同佢爹哋媽咪聯絡，仲可以傾到偈。

「嗰次去台灣拍嘢，約過佢嘅爹哋媽咪見面，嗰陣見到佢爹哋嘅電話仲有一家人合照，佢媽咪就話每日都會講吓，想我哋一齊，唔止電話，仲有電腦，都用我哋啲合照做wallpaper，所以真係唔係話你哋想點就點！」

Scarlett嘆了口氣：「我哋食完餐飯，臨走嗰陣攬咗一吓，跟住上到車我喊到癲咗，流咗唔知幾多公升眼淚。我o依家對將來都有期望，但係未必好似以前咁瞓身，會保留番少少，近幾年發生嘢，俾我發現有好多嘢係唔可以強求，當你越唔強求，上天總係會安排俾你，會俾你更加多。兩年前分開係咁，冇人比自己更加可靠。」

【搵食真係好緊要】
唔知係咪呢個原因，Scarlett話對工作全心全意投入，感覺機會越來越多：「公司對我好好，俾咗我好大自由。我成日都同公司講，念在我係個30幾歲離咗婚嘅女仔，千祈唔好阻搵食，搵食真係好緊要。」又說：「我o依家主力司儀，拍劇客串為主。對我嚟講，做司儀好有安全感，因為可以做到好耐，有一日唔再出現TV，只要我做得好，客戶會返轉頭，我就可以繼續做落去，只係你唔再做電視，未必可以有咁多工作量。」

採訪：何慧斯
髮型：Cedric Tsang@Nova Hair Nail
化妝： Dera Tse
場地提供：浜滝Hamataki