75歲執紙皮朱婆婆 疑被食環署放蛇控「無牌販賣」
食環署執紙皮無牌販賣黎志強
【新增內容】
東區區議會黎志強昨晚在facebook張貼求情信,指近日收到75歲朱婆婆請求,向法庭就其「無牌販賣」求情;黎回覆本報查詢指,朱婆婆早前曾於中環碼頭執紙皮維生,惟最終被食環職員控告她無牌販賣,「對方話『你賣一蚊都係無牌小販』,黎批評食環署執法過嚴、不近人情,「令人覺得個社會好涼薄」。
黎志強指,日前收到朱婆婆求助,央求他撰寫法庭求情信;黎指,朱婆婆年屆75歲,獨居於柴灣興華邨,雖然家貧,惟因不願領取綜援,故向朋友借手推車,以執拾並轉售紙皮賺取生活費,「婆婆話當日佢喺中環碼頭近摩天輪一帶執紙皮,執咗幾個,突然有人話要同佢買幾個紙皮盒,咁婆婆無乜所謂,就按對方要求賣一蚊」。
黎引述朱婆婆所言,當日甫賣出紙皮即有食環職員現身,並控告她無牌販賣,「婆婆無辦法,因為現場人贓並獲,百詞莫辯,雖然都有向食環求情,但對方就話『你賣一蚊都係無牌小販』」,又指其手推車及紙皮均被充公,近日亦收到傳票,需於下周三(21日)就其無牌販賣一事上庭。
黎指朱婆婆患有嚴重風濕關節炎、鼻黏膜炎、胃病,「佢(朱)以前每晚鼻黏膜炎都會留半碗鼻血」,其後雖完成手術,卻希望自力更生,不領綜援,「婆婆個人好有骨氣,佢唔想攞綜援,怕無面」,稱朱只因做一蚊生意,或需面臨數千元罰款。
黎批評食環署執法過嚴,「上一代人可能唔知法例,亦無諗到對方可能有惡意,其實婆婆都只係想自食其力,唔受干預,仲要對方年紀咁大、身體又唔好」,認為是次事例是以法例錯殺良民,「食環執法太嚴亦唔靈活,令人覺得社會好涼薄」,稱法律不外乎人情,望最終法官輕判。黎指現階段有義務律師答允幫助朱婆婆,望最終朱婆婆不用在官司中花費分文。
食環署回覆稱,由於個案已進入司法程序,現階段不會就該個案作出評論。