彭健新的三色松鼠愛犬OK仔，於兩星期前與世長辭，享年15歲！健仔難捨跟愛犬天人相隔，昨在微博貼OK仔遺照深深悼念：「OK仔已經離開我們了，每一天，我都記得他帶來這15年無比的歡樂，OK仔，永遠懷念你。」OK仔生前常跟健仔亮相電視節目及出席活動，精靈可愛的牠比主人更搶鏡，大受市民歡迎。
視愛犬為兒子的健仔，昨接受本報電話訪問難過說：「上兩個星期嘅禮拜日，下晝3點半走嘅，佢已經腳退化，同埋氣管有事，年幾前出問題，因為佢咳得好辛苦，朋友叫我不如人道毀滅，我話唔得，一定要養到佢自己走、自然去。」

「講起都好酸」

提到OK仔的最後一段日子，健仔嘆說：「佢瞓喺度望住我，因為先天性後腳有問題，13歲開始唔行得，情況時好時壞，因為後期唔行得，佢好乖，肚餓會叫，去廁所一定叫。兩星期前禮拜日嘅下晝3點半，佢喺度叫，太太帶佢去小便，放低佢就唔郁，跟住走咗！佢臨走前我啱啱出街做嘢，唔喺佢身邊，我即刻趕返屋企，摸佢已經唔喺度！」
健仔安排寵物善終處理OK仔的身後事，他說：「我整咗啲花畀佢，佢生前最鍾意食我老婆整嘅斑蘭蛋糕，每次見到蛋糕都開心咁叫，我擺咗兩晚喺佢臨終嗰個露台位。噚日火化咗，遲啲會攞埋骨灰，但未知擺邊，可能撒去佢最鍾意嘅地方。」問健仔心情是否仍很難過？他說：「梗係，因為佢跟咗我15年，講起都好酸，喊咗好多次，冇辦法，15歲算耐！」會否再養狗？他說：「應該會，但好難搵到一隻咁有人性嘅狗。」
採訪：皓騫