時裝設計師鄧達智稱林燕妮做人宗旨「點都要靚」，他解釋：「唔靚係唔得，人生一次，點都要靚，呢個係佢人生哲學，我哋都聽過一個笑話，就係佢好怕人哋覺得佢年紀大，事實上佢比我哋坊間識嗰班才女孫郁標、文麗賢等，佢大好幾歲，但佢好介意，好怕人哋講，佢同霑叔分手後，有段時間，佢成日約我去ball，變成佢嘅ball腳，但有一次去加州大學同學會嘅party，有一個同學拎住杯酒，走埋去指住我，問佢(林燕妮)"your son?"，嗰次之後佢就冇再約我，佢嬲到呢，唔知係唔係飲醉，我嗰陣又瘦啲，成日去做運動，佢哋係熟，大約知佢個仔幾歲，我當時三十幾歲，佢個仔廿幾歲，我只係老得慢，出現一個錯誤嘅判斷。」

問到林燕妮出入ball場，均以性感打扮，會否問下意見，鄧達智笑言：「佢只會問你，我係唔係好靚，佢唔會問你意見，佢呢點係好可愛，事實上佢真係美人嚟，佢鍾意着Valentino晚裝，有時會識新嘢，佢買貴衫係面不改容，佢認為人生唔係好多嘢，可以喺手中可以掌握，不過靚呢方面，佢覺得係可以掌握，呢個係人生哲學，錢可以買到佢人生嘅滿足，所以佢面不改容。」

鄧達智指林燕妮對自己最大影響並不是她的散文：「我對佢印象深刻係我小學嗰陣，我已經睇旅遊書同雜誌，其中佢有撰稿俾一本旅遊書，好詳細講去歐洲旅行，由荷蘭開始，我好記得，佢係一個好浪漫嘅人，所以我完全感受到，嗰時已經影響到我。」