2006年世界盃決賽，施丹喺加時比賽用頭撞意大利後衛馬特拉斯，結果畀球證以紅牌驅逐，法國最後射輸12碼飲恨，「施丹頭槌」亦成為咗世界盃嘅經典一幕，而喺嗰屆世界盃之後退休嘅施丹原來對於自己當嘅舉動並唔覺得光彩。

之前已經決定咗喺嗰屆世盃後退休嘅施丹，最近接受法國電視節目《Telefoot》訪問提到呢件舊事嘅時候，承認佢令自己失望。施丹話︰「我唔覺得自豪。我要同所有年輕人、所有教練、所有令足球變得唔同嘅志願人士講，我對呢個動作並唔覺得光彩。但呢個係我職業生涯、我生命嘅一部分，係其中一件唔開心嘅事件，我哋必須接受，必須消化吸收。」