風流嘅馬德鐘星途插水，呢排佢不時拖住太太張筱蘭四圍去，希望挽救形象。本來佢戒媾女，修心養性做住家男人梗係好事，但大前晚佢到湖南長沙參加當地電視台節目，借啲意又竄去蒲吧，對啲熱情fans勁耍大牌，塊面黑過包公，令到fans非常失望。
當晚9點，馬德鐘由四名女子同埋一名男助手陪同，一班人浩浩蕩蕩現身長沙最有名氣嘅高級夜場蘇荷酒吧，雖然天色同酒吧嘅燈光同樣咁黑，但佢依然戴住副明星墨鏡入場，自然極度矚目。

其間馬德鐘都表現開心㗎，不停飲酒，於是不停去廁所，由於佢成晚喺洗手間出出入入，唔少人認出佢，起初有酒客主動同佢搭訕，馬德鐘都有笑吓、同人打個招呼，點知到離場時，佢突然變面，善變程度快過天氣。
飲多兩杯嘅馬德鐘喺11點左右離開酒吧，fans見到佢唔知幾開心，要求佢簽名留念，點知馬生態度超冷淡，搞到啲fans冇晒心機，後來有fans影相，馬德鐘仲即時面燶㖭，現場有內地記者又影埋一份，仲問馬德鐘做乜事到長沙，助手代答佢嚟錄影節目。其實fans都係影張相、簽個名啫，昂藏六尺嘅馬生，使唔使咁小器呀？