望住爸爸又高又瘦嘅背影急步往前，啱啱攞埋找續嘅媽媽努力小跑從後追趕，我不禁暗鬧一聲：妖，你咪又係錫個仔。

大約大半個鐘頭前，喺荃灣載咗個看似憂心冲冲嘅女人。寬鬆嘅雪紡質上衣配搭鬆身長褲，可能啱啱喺溫暖嘅辦公室出嚟，寒冬之下，長大褸亦只係搭喺手，喺違泊私家車嘅夾縫間穿出，截停剛巧路過嘅我。「先去沙田然後入馬鞍山！」確定完行咩隧道之後，女人就低頭上網，車廂變得沈默，直到去到沙田，接埋另一個男人上車之後，車廂先至變得熱鬧。

「今次衰咩？我無聽到MISS HONG個訊息。」男人一上車就問。「佢俾人打呀，唔係佢衰。」男人無聽到口供又斷估，女人無好氣咁解釋返咩事。聽到呢度，加上目的地係學校，似乎乘客係一對父母親。知道真相之後，爸爸竟然無震怒，仲覺得好輕鬆：「俾人打咋？無入醫院即係無事啦，咁邊駛叫埋我去，開會好過啦。」爸爸咁講，媽媽即刻好大反應：「搞錯呀，你有無聽清楚㗎，係你個仔俾人打，俾人打呀，會痛會受傷㗎，你點解可以當無事⋯⋯」由於媽媽嘅批評不停咁重複喺同一個POINT，我就唔覆述喇，大約由大圍市中心上到獅子山隧道公路後，爸爸終於可以開聲：「個仔中四喇，俾人打咁嘅小事自己唔識解決，搵老師搞大件事，仲要我哋趕去，咁佢第時點自立？」

老實講，中四嘅學生打人同俾人打都好正常啫，我估爸爸都係基於呢點而認為俾人打無咩咁大不了，即使如此，要媽媽認同呢個觀點，接近無可能：「俾人打都小事，咁我打吓你丫。」「俾人打唔係小事，只係佢要學識自己處理，而唔係下下同老師講。你諗吓，佢做咗咩俾人打？佢有無還手？佢自己搞唔掂叫老師，下次人地打得佢仲金，佢一定要自己學識解決㗎。」爸爸語重心長咁解釋俾媽媽知，只係觀乎媽媽嘅反應，佢不如留返啖氣暖下肚好過。「你講埋晒啲嘢都奇奇怪怪嘅，一陣唔好咁講呀。」

爸爸無再堅持落去，講幾個公事電話之後，目的地在望。本來我都以為爸爸真係漠不關心，仲一度期待過爸爸會原車返去開會，彩個仔都多餘，但係佢落車後已經一支箭咁入學校，照計都唔係驚老師要OT太耐掛，子女面前，父親大多係口不對心的。

其實爸爸講嘅嘢都有道理，視乎小朋友嘅傷勢啦，今日校園嘅欺凌情況看似比以往嚴重，同時父母小題大做嘅傾向亦都唔低。一向好認同一個道理：喺溫室嘅花係難以適應環境嘅。睇返社會唔少人二三十歲仲依賴父母安排，溫室效應絕對屬於嚴重級別。我哋要保護自己嘅小朋友，同時亦都應該兼顧佢哋對抗風雨嘅能力，始終，無可能保護佢哋一世。

專欄作者簡介：
白告
我的文字你的故事紅的車廂，我的你的紅的。

Facebook link：
https://www.facebook.com/lazytaxi/