韓國演藝圈新人輩出，要上位唔係咁易，即使家底雄厚，亦未必能一炮而紅，反而要等一個機會才能夠突圍而出。

好似29歲嘅李伊庚原來本身係富二代，佢爸爸係LG Innotek集團社長李雄範，李伊庚畢業於首爾藝術大學演技學系，佢出道以來好少提起爸爸，明顯唔想靠父蔭。

而李伊庚近日亦參演多齣人氣韓劇，包括《金裝律師》、《檢法男女》及《加油！威基基》，三齣劇現時都可以喺Viu煲劇網站免費重溫。

李伊庚喺《金裝律師》中飾演濫藥又狂妄嘅富二代，仲嫁禍朴炯植藏毒，雖然僅客串頭兩集，但角色甚有發揮，佢亦演活呢個富二代角色。

而在《檢法男女》中李伊庚飾演熱血刑警，劇中佢雖然吊兒郎當，但第一次見到新紮檢察官鄭柔美時已嗒晒糖，但佢其實十分拼搏，為緝捕毒犯，不惜男扮女裝，設局誘疑犯現身，之後更惡鬥兩名疑犯，即使被刺傷亦不肯罷休，最終完成任務，佢咁大犧牲男扮女裝，獲得唔少網民讚佢好嬌俏。

至於喺《加油！威基基》中李伊庚同樣有唔少搞笑戲份，劇中飾演電影配角演員嘅佢，喺拍攝其中一集時，仲不惜花數小時透過特技化妝變身猿人，十分專業，完全冇富二代嘅架子。

事實上，李伊庚已入行7年，佢亦先後參演過唔少人氣韓劇，包括李鍾碩與金宇彬合作嘅韓劇《學校2013》、全智賢與金秀賢嘅神劇《來自星星的你》，以及另一齣神劇、宋仲基與宋慧喬嘅定情之作《太陽的後裔》，雖然李伊庚喺這些作品中只屬小角色，但佢每次都好用心去演，默默耕耘，讓觀眾留下深刻印象。

更多韓流，喺晒《娛果》
http://fb.com/appledailyent