萬眾期待嘅《金枝慾孽（貳）》今晚首播，不過一開始就太多角色好混亂，連主線關係網民都搞唔清，唔明講乜。

套劇一開波，就影住溥儀，呢個時期離如妃嘅年代差咗成百年，講到大清大勢已去，唔知呢段有咩含意，但網民就好奇演溥儀嘅演員點解唔用香港人。

然後轉個眼就返去如妃，即清朝嘉慶帝嘅時期，以宮中謠傳如妃迫宮女同太監對食一事開始，而呢件事，就要約略講番第一集《金枝》，張可頤演嘅安茜，就係比如妃迫佢同鄂羅里鄂公公做對食夫妻。

然後葉翠翠同蔡少芬演嘅奶媽陸續出場，可惜葉翠翠講對白似足背書，要同蔡少芬對戲，真係有困難，好多網民都覺得佢根本帶唔起情節，破壞咗套劇。

而伍詠薇演嘅淳太妃，係如妃妹妹，但早咗入宮，成為乾隆晚年嘅妃嬪，冇機會享福，因此懷恨妹妹如妃，因如妃係嘉慶帝寵妃。而今集內容主要都係圍繞如妃、淳太妃同奶口(即葉翠翠同蔡少芬)嘅幾方勢力。第一集故事出好多人，亦好混亂，好多網民都話冇上一集咁好睇，不過暫時只播咗一集，都未可以下判斷。