啱啱喺微博宣佈同前妻高磊鑫復合嘅大陸歌手薛之謙，佢喺微博嘅深情留言：「我記得……你跟我時……我一無所有……我不想再尋覓了……請讓我給你所有……反正我們也不再年輕了……那就再愛一次吧……」嗰陣除咗觸動咗網民嘅心之外，太太高磊鑫發微博留言話：「多少淺淺淡淡的轉身，是旁人看不懂的情深……那麼，餘生請對我好一點。」(新聞連結： http://bit.ly/2h5tsqD )

本來都以為有情人終成眷屬，happy ending大家走去BBQ就完場，點知日前有一個大陸網絡模特兒李雨桐喺微博大爆薛之謙同佢之前嘅恩恩怨怨，更聲稱遭薛之謙騙財騙色！

喺9月12號，微博一名叫做李雨桐嘅模特兒寫道：「一直以來的隱忍是勸自己平淡是福，但薛之謙選擇和高磊鑫高調復合，讓以往的一切都成了『設計』，讓我不得不陳述所有真相和事實。」之後佢就喺微博貼出兩份合約，表示自己同薛之謙早喺2012年已經認識，仲合作開咗間網店。

李雨桐續稱，兩人本來只係簡單合作關係，只係知道高磊鑫係薛之謙前任女朋友。後來兩人日久生情，薛之謙就同佢表白，但係同時又表示高磊鑫有咗，仲要求要同薛之謙結婚；點知過咗一排，薛之謙又跑嚟話高磊鑫表示自己流產，令薛之謙懷疑受騙，故要求離婚。

繼續係李雨桐嘅版本。佢話之後高磊鑫索價一千萬分手費，薛之謙就希望李雨桐一齊分擔，如是者時間一路過，錢就一路俾，但最後薛之謙又話要買樓，又話高磊鑫生癌等等，總之原因多多，一拖再拖，最終李雨桐頂唔順，決定分手，喺文尾仲寫道：「曾經賠給高的錢，現在是不是成為我送絡你們的嫁妝呢？」

見到有人咁講，薛之謙嘅Fans企出嚟護主啦，而李雨桐亦繼續爆料，話薛之謙2014年喺泰國發生車禍時，佢(即李雨桐本人)都在場，更加係共坐一部電單車；而薛之謙出事之後，第一件事就係打俾經理人叫佢出新聞，兩人傷勢都算係嚴重，但係薛之謙就將李雨桐嘅傷口影低，再貼上網話係自己嘅，更要求李雨桐唔好話俾任何人知佢都出咗事。

文章末段，附有當日薛之謙張貼嘅一則貼文，同埋李雨桐腳上留疤痕對印，令唔少網民都覺得李雨桐所言嘅可信性大大提高，更重要嘅係，薛之謙喺李雨桐爆出呢件事之後，直接刪除咗當日嘅文章，令事件更加令人覺得貼近真相，更開始有唔少李雨桐嘅朋友幫手貼圖反駁薛之謙Fans嘅論點。

唔識薛之謙係邊個？睇呢度：　 http://bit.ly/2vXx8gB