又係阻街惹嘅禍？深水埗街頭早前發生咗一單警民口角事件，有市民拍咗片，見到多個阿Sir喺深水埗一條街度叫啲途人返上行人路，唔好阻住條馬路。點知啲途人就唔多聽阿Sir支笛，其間有位阿Sir就好勞氣，仲同個𤷪𤺧阿伯喺度對罵。

阿伯：俾你鬧到唔舒服

事發嗰日係上月29號晚8點幾，拍片者戴先生行過西九龍中心對開，拍低呢一幕街頭大戰。當時個勞氣阿Sir同嗰位阿伯爭吵，阿Sir一度手指指問阿伯：「你係咪唔行呀？係咪要叫白車，我幫你急救呀！」阿Sir仲叫阿伯：「身份證唔該，我幫你叫白車！」
阿伯不甘示弱咁同勞氣阿Sir講：「身份證咪身份證囉，你大我呀？」勞氣阿Sir於是又同阿伯講嘞：「你知唔知用緊公共服務呀？你𠵱家用緊政府資源呀！你話要（白車）嘛，你邊度唔舒服？」阿伯隨即妙答：「我俾你鬧到唔舒服呀，你咁大聲！」
現場火藥味甚濃，旁邊有位阿Sir就即刻安撫群眾：「馬路嚟嘛，馬路還馬路」，勸途人返回行人路上，事件擾攘一輪先至結束。戴先生話當時好多人企晒喺條街度，原本係好小事啫，何必呢！