貿易戰重燃不論對上游或下游廠商，均帶來直接衝擊，業界叫苦連天。香港中小型企業聯合會會長麥美儀表示，當初由廠家及買家各自分擔5%關稅（共10%），問題不大，但若將關稅加至25%，買家一定叫停定單，而最慘是有企業「啱啱有兩櫃貨去緊，早幾日先出咗（貨）櫃，你去到都要幾個禮拜」，意味抵達後要交25%關稅。

她續指，廠家一早與客戶定下價錢，「打咗稅之後個客實同佢講數」，到最後廠家有可能要自己承受突然增加的關稅，造成損失，「佢可能賺都冇賺咁多，得嗰幾個percentage（百分比）」。

她稱，整件事影響香港中小企生意是「必然事實」，自從貿戰及政治問題出現後，市場氣氛持續淡靜，「有啲唔敢出貨；就算有貨係因為本身見到有好消息先出」，惟出貨量大不如前，「係試下一季、兩季（貨量）咁出」。

電鍍業會長：不能倖免

香港電鍍業商會會長陳偉表示，若出口至美國市場的產品要繳交25%關稅，屆時從事下游配套產品表面處理的電鍍業將不能倖免，將會「嚴重影響我哋嘅定單」。他解釋，當美國將關稅定於10%時，人民幣貶值約5%，加上買賣雙方在價錢等方面協調，故仍在可接受範圍。惟當關稅調高至25%，廠商「好難去就到呢個咁大嘅加幅，而可以喺價錢上同外國客人做到生意」。他透露，去年環球經濟出現下行壓力，以及貿戰開打，令市場出現負面情緒，「本身做鐘錶、首飾表面處理嘅（行家）都跌咗30%至40%定單」。