經過七星期的休季，香港全新馬季將於明日9月2日開鑼！

當日焦點賽事就係香港特區行政長官盃，往年呢場一班1200米賽事嘅頭馬，不乏一些有潛質的新星，且看今年鹿死誰手。

而想入場馬迷要留意，今年有活動只需把照片上載至個人Instagram，設定為公開帳戶，並標籤#開鑼，即有機會贏取豐富獎品。18/19年馬季，沙田開鑼一共有3000萬多寶撥出，大家可以多花心機參與賽事。

另外，今年有一位新練馬師開倉，就係簡蛇徒弟丁冠豪；騎師方面都有新面孔，南非幫一批批咁運入嚟，今年又多兩個南非騎師利敬國及麥偉利。正式踏入後雷神年代，莫雷拉上季攞到嘅130幾場頭馬散晒出嚟，今年潘頓係咪可以坐大，定係田泰安可以得到蔡神仙幫助下，同潘頓有得鬥吓呢？

韋達又可唔可以延續上季尾強勢，定係新嚟既南非幫可以攪亂大局，或者輪到我地華將爭口氣呀？

六爺羅富全上年一開倉就搶晒風頭，但係始終都未有分級賽冠軍落袋，今年佢手上既兵力，衝擊各項大賽又有咩表現？

從化開咗，跑嘅馬多咗，對香港賽馬局勢會有咩影響？大摩、方仔會唔會及時反彈，衝擊神仙同告仔？各匹質新馬，例如上年四歲嘅打吡精英，今年會喺各項大賽現身嗎？幾匹馬王級賽駒又頂唔頂得順呢班後起之秀？

新一季焦點真係多到數唔晒，錢已準備好買花生啦，你呢？