現年33歲嘅日本女星深田恭子入行20年,最近佢推出兩本到夏威夷取景嘅全新寫集真《AKUA》和《ThisisMe》,獲NDCHOW拍下碧波蕩漾嘅性感靚相,結果甫上架即霸佔銷量榜頭兩位,當地更一度賣斷市,深田恭子為宣傳亦開設Instagram賬戶,連日來不斷公開寫真集花絮照,今日更有佢挺胸趷籮嘅洗車寫真,目前其Ig已累積68萬人追隨,令近年慘封收視毒藥嘅深田恭子終於威番次。
深田恭子經操弗後體型變得大隻咗,更被嘲似摔角手,不過仍無損其女神地位,深田恭子兩本寫集真《AKUA》同《ThisisMe》,分別成為本星期Oricon寫真集銷量榜冠軍及亞軍,分別賣出9,990本同埋9,885本,兩本加埋總銷量約2萬本;至於其同門師妹佐野雛子同日推出嘅水着寫真集《雛子、水着、3年間》,雖然同樣在夏威夷取景,年僅21歲嘅佐野雛子在藍天白雲下硬銷33F上圍,可惜反應卻不及師姐,只銷2,737本排在第5位。