當年今日

  大班同勞工督察會駁火 - 李八方

蘋果日報 2002/01/08 00:00


鄭經翰﹙圖﹚早幾日主持商台《風波裡的茶杯》節目時扯晒火鬧勞工督察,噚晚勞工督察出咗份聲明,同鄭大班駁火。
鄭大班講嗰一單係勞工督察巡廠查身分證嘅投訴,有個女工人叫勞工督察等五分鐘等佢屋企人攞張身分證嚟,個督察都唔肯,大班就扯晒火,大鬧勞工處官員,重自稱開咪七年嚟,首次cut啲官嘅線。
勞工督察會噚晚出咗段聲明反駁,話大班屢次以侮辱性字眼批評勞工督察,呢種謾罵式手法,只會加深市民同公職人員間嘅矛盾,批評大班喺節目中倡議市民違反法紀,挑戰法律,教唆市民唔好同公職人員合作,故意拖延時間,令事件中嘅督察受到不必要困擾。
八方即刻搵大班回應,佢話當日鬧對方唔係人,係官,官高級過人,無侮辱對方;又話勞工處不近人情,大班噚日再收到同類投訴,有個工廠老闆話兩個考試成績優異嘅中七畢業女生職員,因為勞工督察巡廠時,出示唔到身分證,叫佢哋遲啲拎張身分證去勞工處,點知去到先知被人檢控,好慘。大班準備今日喺節目度再次發炮,勞工處好準備接招啦!


E-mail:[email protected]