「秋官」一登台，聽講股市就跌，稱為「丁蟹」現象。不過今年電視嘅秋官一上螢幕，股市反為大升，可惜平機會嗰個秋官一上台，又搞出一場政治風暴，維港匯筆數未計完，沙士問責又未埋尾，「秋官」上場，今次冇丁蟹，不過，「董蟹」又試呼之欲出嘞。

聽土共點　現眼報
阿董聽咗土共支笛，郁咗甚得民望嘅紅姑，委任王見秋繼位，諗住攻佔咗一個「港英餘孽」嘅山頭，點知估唔到咁快就現眼報。秋官去到平機會，以為自己重係鐵面法官，一聲「要走嘅唔係我，係你」，繼而再「如果我今年十八歲，會掟晒佢哋落海」，點知跟住又被揭受咗富豪嘅恩惠，並無申報，一路嗒長俸，一路享受二百幾萬年薪，袋袋平安，呢位判官唔係見秋，又幾似民間傳說裏面嗰個「一見發財」。
胡紅玉做緊平機會主席嗰陣，俾班土共圍攻，話佢薪酬過高。王官空降平機會之後，聽講話會開刀削支出，點解唔由自己嘅年薪削起呢？法官大公無私，既然係阿董嘅人，幫吓阿董滅赤，都好應該吖。
秋官接受某本周刊訪問，條氣好唔順，話佢受到批評，係「政治陰謀」，好卑鄙無恥，佢又話：「政府委任一出，就說我不適合、保守，你都未畀機會我，就來審我，判了死刑，這是甚麼民主法律的制度？」

啱！真係義正詞嚴！之但係，王見秋唔記得咗，由合法程序聘用自北愛爾蘭嘅候任行動科總監、民權事務專家余仲賢，一樣係未上工，就俾秋官炒咗，秋官一樣完全冇畀過機會佢表現吓，咁又係乜嘢民主法律嘅制度呢？
咁都講得出，唔通做法官嘅，一係當自己係閻羅王，一係就會經常性失憶？
胡紅玉離任之前，聘任余仲賢，合理、合法，王見秋上台，就算幾唔順瞅，都應該畀番三幾個月時間，學阿董煲呔最鍾意講嗰句，叫做「磨合期」。當年肥彭咁強人，都未敢未到香港，就炒咗霍德先，又或者連中國咁惡，都冇話喺一九九七年六月三十日午夜一升旗，就即時炒陳方安生。

一揪二串　齊落鑊
今次王見秋捉蟲，平機會成員個個第一時間劃清界線，包括理性親中人士周永新，都忍唔住講句公道說話，大義滅秋，但係秋官又將危機擴大化，主動將阿董擺上枱，話倒他秋官，即是反董咁話。一揪二串，又綁埋阿董一齊落鑊，阿董已經頭都大埋，點解佢揀人，永遠係咁老懵？秋官響朵，咁港人就唔客氣嘞。


傳真︰2623-9278
電郵︰[email protected]