「夾公仔就好像同老闆鬥智鬥力，佢哋可能會設置好多小機關，來增加難度，我哋要諗嘅就係點樣拆解」強國Lolita雅離自2016年起，至今成功夾到逾8,000個公仔，戰績輝煌，絕對稱得上是夾公仔神，閱機無數的她，醒你幾招攻略，等你從此唔使再做loser。

繼續睇：
【直擊皇者夾の對決】強國Lolita兩年夾8千公仔 Battle港女高手邊個贏？( https://bit.ly/2sp9Gsc )
【直擊夾の達人】寧花$6萬夾公仔 強國Lolita：開心過買名牌袋( https://bit.ly/2sjBeA5 )

1. 睇定啲咪心急
雅離說，有些公仔她是「一定唔會夾！」她指，公仔檔板的高低、目標公仔托底的東西，也有可能是讓你失敗的陷阱！她以旅行青蛙公仔機為例：「呢部機檔板好低，似乎輕輕一夾就會夾到，但這個爪設定到一下夾就會轉動」即是如何放夾落點是永遠不會準的。另外就是目標公仔托底，「下面鋪的骰仔有好多窿窿罅罅，公仔掉下來時，可能會彈走，越夾越遠。」所以睇定啲，千萬不要「盲樁樁」就入錢夾公仔！

2. 公仔擺法有乾坤
公仔的擺法也有可能影響成功機率。雅離指，有些夾公仔店老闆會在檔板前，將公仔傾斜墊高，砌成「圍牆」，「想夾到公仔出來就要越過呢啲圍牆」。此外，公仔的模樣也會有影響，假如公仔軟身、彈性高、線條筆直就會比較難夾；相反，公仔若三尖八角、身上多「凹位」，玩家就可控制夾爪來卡住公仔的「凹位」，很大機會會夾到公仔！

3. 夾爪點用有技巧
以為夾公仔只是移移搖桿、撳掣了事？那你就錯了。雅離教路，運用夾有「急收」及「卡位」等等方法。對付上文提及的「圍牆」，就可以用「急收」法，調校好搖桿在公仔上方後撳掣落夾，當夾落到一半的時候，馬上再撳多一次掣，「係二次收夾，夾會突然間有度力」，就可將公仔逐點逐點移近洞口，順利的話重複幾次就會夾到；「卡位」法即是看準公仔的「凹位」來落爪，以便卡實公仔。

不過，說了這麼多，雅離說：「其實手感最緊要」，言下之意，要變高手沒可能一步登天，練習多點就最實際！

記者：鄭悅童、周凱瑩
攝影：朱家駿