新練馬師麥菲文未派馬出賽，先落筆打三更，有九隻馬上星期二喺馬房行機時發生意外，有八隻馬要休息養傷，包括原本今日有份跑嘅「宸龍」（馬會話隻馬係因為中暑同精神不振退出），未跑過嘅「超強奇兵」更傷重死亡。

呢次可以話係罕見嘅意外，最大問題係馬會今次冇主動公佈，因被傳媒篤爆咗，先肯作出回應。

行馬機嘅運作，類似啲商場嘅旋轉門，今次麥菲文馬房出意外，主要係其中一格有馬鬧情緒，跑向相反方向，令隨後嘅馬連串受阻。喺意外發生後，行馬機即時截電，但啲馬已經受驚亂衝，結果造成咁多隻馬受傷。

意外嘅嘢好難避免，最令人反感嘅反而係封鎖消息，傳聞在場嘅馬會賽事部同保安部人員，事發後有人講明唔准在場人士對外披露今次事件。但係意外涉及馬匹健康狀況、馬主個人資產同馬迷投注利益，馬會根本應該即時主動交代，如今畀人踢爆先事後補鑊，咪唔衰攞嚟衰。

據聞落柯打唔准出聲嘅係負責管理馬房嘅高層，現時做管理馬房呢班無疑係經驗豐富，弊就弊在佢哋思想脫節兼離地，衰咗就顧住施壓冚住件事。其實紙點包得住火，家陣拎部手機拍片，話咁快就傳開晒，點解發生意外要隱瞞？整色整水仲捉蟲，搞到形象同誠信插水。任何管理工作都要與時並進，馬會都應該諗吓係咪要畀後生啲嘅一輩試吓接棒。

今次喺奧運馬房出事，透明度係咪足夠自然係外界討論焦點，更加帶出下年啟用嘅從化訓練基地要做得更好，假若屆時基地嘅馬房有乜意外發生，山高皇帝遠，通報機制更加要做到一絲不苟，令馬主同馬迷有信心。

阿Joe