無可否認，利物浦係香港其中一支最受歡迎嘅球隊，佢哋打算7月中展開亞洲之旅，其中一站更加係香港。不過正值金融海嘯嘅艱難時刻，紅軍居然獅子開大口，要求當年皇馬「6條煙」訪港時嘅待遇，睇怕都幾難成事。好彩我求大俠收到風，5月有場星級老餅賽，球迷可以止一止渴先！
利物浦當地傳媒周三報道，話紅軍打算喺今年7月17至26日，展開為期10日嘅亞洲之旅，除咗香港外，仲有曼谷同新加坡。據了解，負責今次紅軍東征嘅代理嚟自新加坡，佢哋由於有個新賭場包底贊助，順理成章就傾成咗新加坡呢站。唔知係咪紅軍以為亞洲錢易搵，就叫代理以同一條件去sell其他兩站。

羅傑承：戲金起碼要減半

我求大俠聽足總副總幹事林誠駒講，紅軍確實有派人「敲門」，但佢哋要求嘅待遇好高，同03年皇馬嚟香港差唔多，要包晒隨隊幾十人嘅機票同食宿。肥林仲話，如果香港真係有人頂得順，足總只會負責派港隊出戰同埋中間抽佣嘅角色。
近幾年都有搞外隊嘅南華足主羅傑承，話𠵱家頂級嘅歐洲球隊戲金叫到150萬美金（約1,167萬港元），以大球場40,000個座位計，平均票價收每張4舊，爆滿都只係收1,600萬，扣埋大球場抽佣兩成，足總抽佣半成，根本就係蝕本生意，建議利物浦喺呢個環境要面對現實，至少戲金減半先至合理。同樣好鍾意辦外隊嘅傑志總領隊伍健，承認曾經同利物浦接觸，但就話要搞唔係唔得，等香港有個可以坐95,000觀眾嘅球場先有得諗。
5月或有簡東拿睇
利物浦嚟香港十劃都未有一撇，但我求大俠就可事先爆料，今年5月香港或者會搞場老餅表演賽，聽講「奧脫福之王」簡東拿都有份，而全隊最後生嗰個好似喺荷蘭射手哈索賓基，陣容都幾吸引㗎。