【隔牆對論】
面對青年關愛協會全方位欺凌法輪功，小學教師林慧思路見不平，怒爆粗口：「What the Fuck……賤人……八婆﹗」，蓋過林老師伸張公義的原意。挺警方的市民不甘受辱，挺林一方不甘受屈。林慧思的父親林森成說，面對警方挑釁，女兒拒絕在沉默中滅亡才爆粗。教協總幹事、立法會教育界議員葉建源卻認為，教師即使面對不公義，也要保持專業，拒說粗口，因為斯文有理，同樣有效；言行一致，才能身教。
記者︰彭美芳　姚國雄

記：《蘋果》記者
葉：教協總幹事、立法會教育界議員葉建源

爆出林慧思事件後，有團體打算舉行集會挺警方，聲討林慧思。教協同時發聲明，批評林老師「言辭過激過火，則屬不當」，教協被指立場溫溫吞吞、令人失望、有道德潔癖，填詞人林夕更以「嗚呼哀哉」回應此聲明。相反，有教協會員另發網上聲明，表明維護林慧思、反擊警方的協會，至今有逾4,000人聯署。

記：以往有教師違反操守、被捕、犯法、甚至被判入獄，教協也鮮有發聲明，為何教協要為林老師發聲明？是否要做道德判官？
葉：我哋冇做任何道德判斷，唔係要做道德判官。聲明係要回應有團體以街頭行動狙擊林老師，咁樣做係唔啱、不必要。林老師當日所講嘅嘢，唔係純粹發洩，背後係有信念，聲明唔係要判斷佢嘅信念啱唔啱、好唔好。
聲明可能寫得唔夠好，有人認為教協離晒譜，唔維護林老師，話我哋踩佢一腳。教協覺得好冤枉，因為我哋冇咁嘅意思。但都會有人問，我哋係咪包容林老思、同意佢講粗口？

記：站在公義前，講粗口是否為教協所不接納？
葉：林老師為講粗口道咗歉，所以我哋先寫呢句（言辭過激過火，則屬不當）。作為教師團體，我哋都唔想學生講粗口，解決問題時有好多方式，唔一定用粗口，用粗口有好多副作用，只係發洩咗。
我明白粗口喺社會上有其他功能，或係其他人生活上嘅助語詞。一般而言係唔好嘅，我哋都希望老師喺工作上，或者工作以外，唔好講粗口，但點樣去評論講粗口，每個情況都有唔同。例如，我哋都會教小朋友唔好打架，但如果真係打起上嚟，我都要睇吓佢點解打架，係見義勇為，定係蝦蝦霸霸。

記：林老師算不算見義勇為？
葉：係呀，林老師係背後有信念，如果當日嗰番話，唔用呢啲詞語（粗口），其實係對佢嘅表達，冇任何削減，佢用咗（粗口）之後，效果亦唔見特別強。老師係有選擇，但人有時會火遮眼，有時會激動，我哋都明白同體諒，但去到學校、公眾層面，社會對教師期望係高啲。

記：在這個時代，教師是否不能講粗口？
葉：我哋希望老師言行一致。我覺得老師如果係教學生唔好講粗口，佢自己本身都應該唔好講。唔講粗口有好多原因，因為粗口本身係好多侵犯性，但部份粗口未必。
例如，電影《籠民》入面，廖啟智講咗一句粗口，跟住套戲被列為三級，我當時覺得點解一套戲，因為一句粗口而變成三級呢？呢套戲係非常有社會性、寫實，導演張之亮非常克制，佢揀過用乜嘢粗口，佢認為唔同粗口係用喺唔同情況。但大家諗諗，教師如果喺班房講緊粗口，其實都幾得人驚。

記：那麼你說粗口嗎？
葉：有時我哋都會話「嬲到想講粗口」，有時我哋心裏頭都會好憤怒，覺得用正常語言無法表達出嚟，但我哋都可能收住，我唔想用我講唔講粗口，複雜咗件事。

記：如果你是林慧思，當日你會如何處理？
葉：好難講，每個人有唔同風格，我覺得唔係只有一種表達方式，我會斯文啲，或者溫文啲，我會去查詢、了解、畀吓意見呀，但社會上有唔同性格嘅人。唔同性格嘅人，係有唔同表現。
林老師個人比較強烈、激烈啲，大聲表達意見都可以接受，只係講呢幾句話嘅時候，刪除咗嗰啲助語詞，佢講嘅嘢依然係咁有力。

記：但在林老師的情況，你認為「斯文」能否解決問題？
葉：我認為，最終係要靠理性、講道理去解決問題，用好激烈的方法，有時就係會傷害對方，激烈的方法就係令對方難受。

記：此事發展到今日這個地步，你認為誰人最大責任？
葉：如果個別團體唔小事化大，畀學校空間去處理呢件事，根本唔會發生今次嘅情況。睇闊啲，今次係民主同建制派，各自有一個激烈嘅陣營出咗嚟，初次對壘，呢種情況將來係會再發生，只係因為社會冇一個公平方法去解決問題，呢個就係民主制度。

mailto:[email protected]

有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange