鄧紫棋(G.E.M.)嘅「Queen of Hearts世界巡迴演唱會」香港站將喺9月16號假紅館舉行，今天係信用卡優先預售門票，早上9點開售，由於反應熱烈，訂票系統一度「大塞車」，8個鐘內所有門票被搶購，即宣佈加開9月17號一場，以答謝G.E.M.迷。

G.E.M.剛由上海返港，走咗去做指定優先訂飛平台做「接線生」，以真聲為歌迷親自落order買飛，G.E.M.竟然「倒自己米」，整蠱想買飛嘅歌迷，竟然有唔少歌迷認唔到佢，第一位「受害歌迷」致電訂飛時，G.E.M.不斷同對方講：「G.E.M.啲歌都唔好聽，點解要買佢啲飛？」歌迷聞言即反駁：「你幫人訂飛，點可以咁話人㗎？」G.E.M.未有罷休繼續整蠱：「睇報道話佢人品唔好，唔好睇佢演唱會啦！」

歌迷再反擊並教訓「接線生」：「你係咪畀人鬧得少，我鍾意睇咪得，你理得人哋啫！」之後G.E.M.自爆身份，仲向歌迷答謝：「好開心，好少有人咁樣維護我。」歌迷得知被G.E.M.整蠱後，竟然笑到收唔到聲。

輪到第二位歌迷致電訂飛時，G.E.M.竟然自嘲演唱會唔抵睇，仲sell對方睇李克勤、譚詠麟、許冠傑嘅演唱會，「受害」歌迷話：「點解推介我睇其他演唱會？我睇鄧紫棋演唱會有何問題？」個歌迷態度幾強硬，扮「接線生」嘅G.E.M.就話：「其實我都好鍾意G.E.M.，好多人話我唱歌似佢，不如你都聽吓……」話畢即唱《Someday I'll Fly》，歌迷聽到對方嘅歌聲後即問：「嘩，真係好似喎!你係咪G.E.M.嚟？」G.E.M.死話自己唔係，仲笑言想參加大台n年前嘅節目《殘酷一叮》。

有歌迷火速認出「接線生」係G.E.M.假扮，將電話開成擴音模式，同身邊朋友分享，不過G.E.M.就向佢哋作另類整蠱，要求歌迷同佢合唱《All About You》。