林煒珽（Veronica）的攝影風格以multiple exposure為基本，不過她鍾情以透明感的物料表達出疊影美感，亦表現她創意的一面，她剛結束的首個個人攝影展以《疊影空間》為題，正如她所言：「我唔鍾意太多details，唔鍾意太清楚嘅嘢，可能影個海會影到好濛，我唔要線條，我要一片咁出嚟，我要好靜好calm感覺，唔鍾意太Busy。」

今次展覽就圍繞四個系列，合共14張作品，當中有不少難忘事，如焦點的瑜伽人像，她就以數元買來的垃圾袋當道具，包裹在瑜伽導師好友梁惠婷身上，營造光影的半裸線條，她表示：「我不嬲有影開瑜伽，身邊朋友都係玩瑜伽，自己本身都有玩，不過整親條腰，所以就少咗，做瑜伽時會迫自己做啲難度高嘅pose，其實拍攝呢個題材唔難，如果搵到人做到我要求嘅高難度pose，佢會做到我想做到嘅，影呢輯相係用咗某一個朝早嘅兩個鐘，其實prepare時候買咗一個垃圾袋，比較容易啲做法，唔會做得太複雜。」

在影像加工，如貼上金箔貼紙亦是她作品風格之一，以她拍攝的大月亮為例，她表示：「放工一天黑時就去影，等佢慢慢升，好多時係食完飯，經過見到個月亮係full moon，不如而家去影相，但已升到好高。呢張相係去廣州影，咁啱一個地方經過見到個月亮，又咁啱帶咗部機，全部都咁啱。而點解用金箔？因為之前見到日本好多屏風都係用金色，喺京都去到金箔寺，好多人想影，金色係一樣好搶眼嘅嘢，吸引到人哋去影。」

另一個系列，她就以粉彩色為色調，三幅一組的作品是她數年前跟公司去以色列拍旅遊節目時拍攝，之後調至暖色，再印在反光的物料上，她說：「去到先知45度，係長期好熱好熱，影咗好多沙漠嘅相，最辛苦係天氣，我最驚熱。」自然風景，亦是Veronica另一個喜歡的主題，當中有去了法國捕捉山的形態，亦有在香港行山時鳥瞰下的建築物，她表示：「呢個係最複雜透明板，曬嗰時搵膠片印出嚟，唔係好多人印張相喺膠片到，同個透明感，試過好多次，建築物相喺呢排好多人影。」

採訪：梁錦雯
攝影：陳慧安
攝錄：林德雄

《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-----------------------------
星期一至五晚上10點半
《動腦Q》Let's Q the money！
http://bit.ly/2QW8LcI